តោះ! ស្តាប់លោកមេគយនិយាយរឿងចាប់ឡានគេយកទៅជិះខ្លួនឯង...
ថ្ងៃចន្ទ ទី២៤ ខែកក្កដា ឆ្នាំ២០១៧ ម៉ោង ១២:៤១ (24-07-2017 12:41)
ខេត្តបាត់ដំបង ៖ ក្រោយពីផ្ទុះរឿងអាស្រូវ
ហើយត្រូវបានផ្សព្វផ្សាយជាសាធារណ:លើករណីនាយទាហានម្នាក់វាយមន្ត្រីគយប៉ោងភ្នែកម្ខាង
ដោយសារលោកគយចាប់រថយន្តគេយកទៅជិះដើរលេងផឹកស៊ីសប្បាយ
ត្រូវលោកយ៉ែម ខេមរ៉ាត់
ប្រធានការិយាល័យគយនិងរដ្ឋាករប្រចាំច្រកទ្វារតំបន់អូររំដួល
ស្រុកភ្នំព្រឹក បានបំភ្លឺប្រាប់កោះសន្តិភាព កាលពីល្ងាចថ្ងៃទី២៣
កក្កដា ថា រឿងរថយន្តម៉ាក TOYOTA VIOS
ពណ៌.សចង្កូតស្ដាំនាំចូលពីប្រទេសថៃ ដោយមិនស្របច្បាប់
ហើយត្រូវអង្គភាពរបស់លោកចាប់រឹបអូសពីមន្ត្រីយោធាឈ្មោះផាន
យុទ្ឋឋាន ហៅគីប ដែលមានការចោទប្រកាន់ថា កូនចៅរបស់លោកឈ្មោះឈួន
ឃីសាក់ ជិះចូលខារ៉ាអូខេបង្កឱ្យមានបញ្ហានោះ
តាមពិតមិនមែនដូច្នេះទេ គឺរូបលោកជាអ្នកជិះរថយន្តនោះ ។លោកយ៉ែម ខេមរ៉ាត់ បានប្រាប់ថា នៅយប់កើតហេតុ (២២.០៧.១៧) កូនចៅរបស់លោកបានផឹកស៊ីជាមួយលោកនៅស្នាក់ការ តែក្រោយបញ្ចប់ កូនចៅចង់ច្រៀងសប្បាយក៏នាំគ្នាជិះរថយន្តទៅច្រៀងនៅស្រុកកំរៀង ដែលមានឈ្មោះឈួន ឃីសាក់ ផង ។ មេគយច្រកអូររំដួលរូបនេះនិយាយថា រហូតដល់ម៉ោង១០យប់ កូនចៅបានខលហៅលោកឱ្យទៅចូលរួមច្រៀងលេងសប្បាយ តែដោយរថយន្តមួយគ្រឿងរបស់កូនចៅ ឈប់ពាំងរថយន្តលោកមិនអាចចេញបាន ដែលលោកអត់ជិះ លោកក៏យករថយន្តដែលចាប់នេះជិះទៅខារ៉ាអូខេ ដើម្បីច្រៀងលេងជាមួយកូនចៅ ។
លោកយ៉ែម ខេមរ៉ាត់ បានបញ្ជាក់ទៀតថា តាមពិតរថយន្តនោះលោកជិះតាមក្រោយ មិនមែនកូនចៅលោកជិះទៅទេ ប៉ុន្តែពេលជិះទៅដល់ក្លិបខារ៉ាអូខេ «ជីវ៉េល» ស្រុកកំរៀង ហើយលោកចូលក្នុងបន្ទប់បានបន្តិច ក៏ឃើញមន្ត្រីយោធាឈ្មោះផាន យុទ្ធឋាន ហៅ គីប ចូលទៅដល់ដែរ សួរនាំរឿងរថយន្តក៏ផ្ទុះរឿងនេះតែម្ដងទៅ ។ តាមពិតលោកមិនដែលជិះរថយន្តនេះទេ គឺទើបជិះម្ដងក៏មានរឿង ។
ទោះជាយ៉ាងណា ករណីជម្លោះរវាងលោកគយ និងលោកយោធា បានបង្កឲ្យមានការរិះគន់យ៉ាងខ្លាំងពីមហាជន ។ ជាពិសេសមន្ត្រីគយ ដែលចាប់រថយន្តគេយកទៅជិះដើរផឹកស៊ីសប្បាយ ។ ប៉ុន្តែជម្លោះនេះ ត្រូវគេឃើញមតិនានានៅលើបណ្ដាញសង្គម ហាក់បានសរសេរបែបចំអកទៅកាន់មន្ត្រីគយច្រើនជាងមន្ត្រីយោធា ដែលវាយមន្ត្រីគយប៉ោងភ្នែក ។ គួររំលឹកថា ញាក់សាច់...លោកយោធាចូលទៅស្រាយកំហឹងលោកគយ ដល់ក្នុងបន្ទប់ខារ៉ាអូខេ
ប្រភព៖ កោះសន្តិភាព
Comments
Post a Comment