សាយ ឈុំ ចុះហត្ថលេខាលើវិសោធនកម្មច្បាប់ស្តីពីគណបក្សនយោបាយ
ទីបំផុតទៅដូចការលើកឡើងរបស់ក្រុមអ្នកវិភាគ វិសោធនកម្មច្បាប់ស្តីពីគណបក្សនយោបាយ ត្រូវបានប្រមុខរដ្ឋស្តីទី លោក សាយ ឈុំ ប្រធានព្រឹទ្ឋសភា បានចុះហត្ថលេខាដាក់ឲ្យប្រើប្រាស់ជាផ្លូវការហើយ នៅថ្ងៃទី២៨ ខែកក្កដា ឆ្នាំ២០១៧ ។
នេះបើយោងតាមអ្នកនាំពាក្យគណបក្សប្រជាជនកម្ពុជា លោក សុខ ឥសាន ដែលប្រាប់ Fresh News នៅព្រលប់ថ្ងៃសុក្រដដែលនេះ ។
លោក សុខ ឥសាន បានបញ្ជាក់ថា «គោលបំណងនិងសំណូមពរនៃការធ្វើវិសោធនកម្មច្បាប់នេះ គឺសម្រាប់អនុវត្តចំពោះគ្រប់គណបក្សនយោបាយ ដែលមាននៅកម្ពុជា ស្របតាមសភាពការណ៍ថ្មីរបស់កម្ពុជា ក្នុងគោលបំណងតម្រង់ទិសឲ្យគ្រប់គណបក្សនយោបាយ គោរពនិងអនុវត្តយ៉ាងខ្ជាប់ខ្ជួន នូវលទ្ធិប្រជាធិបតេយ្យ និងពង្រឹងនីតិរដ្ឋ ស្របតាមស្មារតីនៃកិច្ចព្រមព្រៀងទីក្រុវប៉ារីស ថ្ងៃ២៣ តុលា ឆ្នាំ១៩៩១ និងរដ្ឋធម្មនុញ្ញនៃព្រះរាជាណាចក្រកម្ពុជា»។
សូមបញ្ជាក់ថា សេចក្តីស្នើវិសោធនកម្ម ច្បាប់ស្តីពីគណបក្សនយោបាយ ត្រូវបានផ្តួចផ្តើមឡើងជាថ្មី ដោយក្រុមតំណាងរាស្ត្រគណបក្សប្រជាជនកម្ពុជា។
ច្បាប់ថ្មីនេះត្រូវបានកែប្រែចំនួន ៥មាត្រា ក្នុងនោះមាត្រា ៦ថ្មី(ពីរ) មាត្រា១១(ថ្មី) មាត្រា៤៤ថ្មី(ពីរ) មាត្រា៤៥ថ្មី(ស្ទួន) និងមាត្រា៤៨ថ្មី (សួន) ជាដើម។ មាត្រា៦ ថ្មី(ពីរ) បានកំណត់ថា គណបក្សនយោបាយមិនត្រូវឃុបឃិត ឬប្រើប្រាស់សារជាសំឡេង រូបភាពឯកសារជា លាយលក្ខណ៍អក្សរ ឬសកម្មភាព របស់ទណ្ឌិតជាប់ទោសបទឧក្រិដ្ឋ ឬពីបទមជ្ឈឹម ដើម្បីជាផលប្រយោជន៍នយោបាយខ្លួនឡើយ។
ដោយឡែក មាត្រា៤៨ថ្មី (សួន) ក៏បានកំណត់មិនអនុញ្ញាតឱ្យ គណបក្សនយោបាយណា មានឈ្មោះ ឬរូបរបស់រូបវ័ន្តបុគ្គលផងដែរ។
ការចុះហត្ថលេខារបស់លោកប្រធានព្រឹទ្ឋសភា សាយ ឈុំ ក្នុងនាមជាប្រមុខរដ្ឋស្តីទីដើម្បីដាក់ឲ្យប្រើប្រាស់នូវវិសោធនកម្មច្បាប់ស្តីពីគណបក្សនយោបាយខាងលើនេះ បានធ្វើឡើង បន្ទាប់ពីព្រះករុណា ព្រះបាទ សម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជាបានយាងទៅទីក្រុងប៉េកាំងពិនិត្យព្រះរាជសុខភាពកាលពីព្រឹកថ្ងៃអាទិត្យកន្លងមកនេះ ហើយមិនមានមន្ត្រីណាបញ្ជាក់ព្រះអង្គនិងសម្តេចម៉ែនឹងយាងនិវត្តន៍មកកាន់មាតុភូមិនៅពេលណានោះ ភារកិច្ចនេះត្រូវបានក្រុមអ្នកតាមដាននយោបាយមើលឃើញថា អាចនឹងធ្លាក់ទៅលើលោក សាយ ឈុំ ប្រធានព្រឹទ្ឋសភាជាអ្នកចុះហត្ថលេខាជំនួសព្រះមហាក្សត្រក្នុងនាមជាប្រមុខរដ្ឋស្តីទី ។
គណបក្សសង្គ្រោះជាតិ ចាត់ទុកវិសោធនកម្មច្បាប់ស្តីពីគណបក្សនយោបាយជាលើកទី២នេះ ថាផ្ទុយពីគោលការណ៍ប្រជាធិបតេយ្យសេរីពហុបក្ស ធ្វើឲ្យជាតិបែកបាក់ ព្រមទាំងមានចរិតនយោបាយគាបសង្កត់លើសិទ្ធិបុគ្គល និងគណបក្សនយោបាយ ដែលអាចធ្វើឲ្យការបោះឆ្នោតជាតិខាងមុខមិនសេរី និងមិនយុត្តិធម៌ ហើយជាពិសេសវាដើរផ្ទុយនឹងព្រះរាជបំណងរបស់អតីតព្រះមហាក្សត្រ ព្រះបរមរតនកោដ្ឋ ព្រះបាទ នរោត្តម សីហនុ ទៀតផង ដែលព្រះអង្គចង់ឲ្យមានការបង្រួបបង្រួមជាតិ និងដោះស្រាយបញ្ហារវាងខ្មែរ និងខ្មែរ។
សេចក្តីស្នើវិសោធនកម្មច្បាប់គណបក្សនយោបាយលើកទីមួយ ដែលចែងមិនឲ្យទណ្ឌិតធ្វើជាប្រធានគណបក្សនយោបាយបាននោះ ត្រូវបានមជ្ឈដ្ឋានជាតិ និងអន្តរជាតិ ចាត់ទុកថាជាច្បាប់សំដៅរឹតបន្តឹងគណបក្សប្រឆាំង និងប៉ះពាល់ដល់គោលការណ៍ប្រជាធិបតេយ្យ សេរីពហុបក្ស ក៏ប៉ុន្តែវាត្រូវបានក្រុមប្រឹក្សាធម្មនុញ្ញឯកភាពលើខ្លឹមសារទាំងស្រុងដោយគ្មានការកែប្រែ ។
តាមគម្រោងនៅពេលនោះ ច្បាប់នេះនឹងត្រូវថ្វាយព្រះមហាក្សត្រដើម្បីព្រះអង្គឡាយព្រះហស្តលេខា ក៏ប៉ុន្តែព្រះមហាក្សត្រ និងសម្ដេចម៉ែ បានយាងចេញទៅទីក្រុងប៉េកាំង នៅថ្ងៃដដែលនោះ ដើម្បីទៅពិនិត្យព្រះរាជសុខភាព ទើបលោក សាយ ឈុំ បានចុះហត្ថលេខាដាក់ឲ្យប្រើប្រាស់ច្បាប់នេះក្នុងនាមលោកជាប្រមុខរដ្ឋស្តីទី ជំនួសព្រះមហាក្សត្រពេលទ្រង់អវត្តមាន ៕
ប្រភព៖ Angrut News
Comments
Post a Comment